इटहरी ।कोशी प्रदेशको प्रदेश खेलकुद विकास बोर्डको आयोजनामा हुन लागेको कोशी प्रदेश मुख्यमन्त्री कप नकआउट फुटबल प्रतियोगिता खेल पर्यटनको लागि कोशेढुंगा सावित हुने बोर्डका सदस्य सचिव हंशराज वाग्लेले बताएका छन् ।
पहिलो पटक पूर्वी पहाडी जिल्ला ओखलढुंगामा हुन लागेको प्रतियोगिता तयारीबारे आइतबार ओखलढुंगामा पत्रकार सम्मेलनको आयोजना गर्दै वाग्लेले खेलको सम्पुर्ण तयारी पुरा भएको समेत बताएका छन् ।
३० वर्षपछि ओखलढुंगामा प्रदेशस्तरीय प्रतियोगिता हुँन लागेकोमा स्थानीयबासि र खेलप्रेमी सबै उत्साहित भएको सदस्य सचिव वाग्लेले बताए । खेलाडी तथा अफिसियललाई स्वागत गर्न खेलमैदान रहेको सिद्धिचरण नगरपालिकामा बजार क्षेत्रभरि स्वागत ब्यानर टाँगेका छन् भने जनप्रतिनिधि, तथा स्थानीय खुसि देखिएका छन् ।
असार ४ गतेदेखि हुने प्रतियोगिताका लागि मैदान सम्याउने कामसमेत सकिएको छ साथै रंगशालाको अन्य काम सकिएको बताइएको छ ।
प्रतियोगितामा कोशी प्रदेशका १३ जिल्लाको सहभागिता रहने बताइएको छ ।प्रतियोगितामा खेलाडी, अफिसियल तथा निर्णायक गरेर ३०० जनाको सहभागिता रहने बताइएको छ भने प्रतियोगितामा ३० लाख रुपैयाँ भन्दा माथि खर्च हुने आंकलन गरिएको छ ।
प्रतियोगिताको विजेताले नगद २ लाख, ट्रफी, मेडल र प्रमाणपत्र पाउनेछ भने उपविजेताले नगद १ लाख ट्रफी, मेडल र प्रमाणपत्र पाउनेछन् ।
त्यस्तै, प्रत्येक खेलको प्लेयर अफ द म्याचलाई नगद ५ हजार रुपैयाँ प्रदान गरिने बोर्डले जनाएको छ ।प्रतियोगिताका उत्कृष्ट गोलकिप्पर, गोलरक्षक, मिडफिल्डर, फरवार्ड, प्रशिक्षक र उच्च गोलकर्तालो पाँच हजार रुपैयाँ र ट्रफी पाउने छन् ।
